媒體訪問 – 東方日報 6月21日

507 0

6月21日東方日報刊出義工探望獨居長者https://orientaldaily.on.cc/cnt/news/20200621/00176_064.html

中環出更:探望長者 黃國權帶埋醫生 理髮師 維修工

隨住疫情放緩,禁聚令亦得以放寬,差唔多三個月冇舉辦慈善活動嘅愛心飯團創辦人黃國權(Danny),尋日聯同一班義工探訪獨居長者,除咗送上牙膏、衣物、茶包等必需品之外,更加係第一次邀請醫生、理髮師同家居維修義工協會嘅師傅參與活動,希望了解長者生活上嘅需要,解決各種疑難。

黃國權(中)上門探訪獨居長者,理髮師Silas(左)同甘醫生(右)都響應活動。(葉家亨攝)

黃國權(中)上門探訪獨居長者,理髮師Silas(左)同甘醫生(右)都響應活動。(葉家亨攝)

慈善活動恢復舉辦,Danny話引頸以待,因為自從活動今年三月暫停後,不時都有老人家喺佢公司門口,問幾時有得派飯,而佢終於都可以實牙實齒咁話,將於周一開始正式恢復派飯。至於今次上門探訪長者,就用咗兩個星期時間籌備,並得到五十幾位義工參與。

嚴偉貞:老人家好想義工留耐啲

家訪義工會分為十五個小隊,分別前往太子、深水埗、觀塘等地區嘅舊樓,上門探訪獨居長者。隨隊嘅醫生會問吓長者健康有咩問題,有需要會轉介同跟進,而如果有長者需要剪頭髮嘅話,理髮師會即場同佢剪,至於維修義工就會幫手睇吓長者嘅屋企有乜地方要維修,簡單工程會即場處理,但比較大嘅工程就要另約時間上門修理。

劉健儀(左)同嚴偉貞(右)攜同日用品,向獨居長者送上關懷。

  • 劉健儀(左)同嚴偉貞(右)攜同日用品,向獨居長者送上關懷。

陳漢文話疫情期間接到嘅求助個案多咗三成。

  • 陳漢文話疫情期間接到嘅求助個案多咗三成。

愛心飯團名譽會長嚴偉貞、榮譽會長劉健儀、仲有家居維修義工協會創辦人陳漢文亦係今次家訪義工之一。嚴偉貞話啲老人家見到佢哋都好開心,好想啲義工留耐少少,唔捨得佢哋走,又認為老人家的確要多啲人關心。以往約莫兩個月就會剪一次頭髮嘅嚴偉貞,受到疫情影響,已經有半年無幫襯髮型屋,依家會用頭箍紮起頭髮,不過佢話就快會去剪頭髮,覺得一頭短髮會清爽啲。

陳漢文話疫情爆發以來,長者向佢哋求助嘅個案上升三成,主要係石屎或油漆剝落、漏水同鋼筋外露等,呢啲工程唔算難處理,通常幾個鐘就搞掂。但佢話有部分非牟利機構擔心義工上門,會將外間嘅病毒帶往長者寓所,所以疫情肆虐期間,都唔主張上門維修。

卓妮