媒體訪問-東方日報

1804 0

中環出更:施比受更有福 黃國權向長者派飯講多謝

雖則話施比受更有福,但如何令對方樂意接受恩惠亦係一門學問。舉辦街頭派飯活動嘅慈善團體「愛心飯團」日前喺旺角一間酒樓招待數百名長者一齊聚餐,創會會長黃國權話,有賴兩間中學嘅學生幫手,先可以每星期順利向長者派飯,又話咪以為派飯係好簡單嘅工作,其實要同長者有良好溝通,佢仲要求參與派飯嘅學生必須向嚟領飯嘅受助人講「多謝」同祝福對方身體健康,究竟點解派飯仲要講番「多謝」呢?

黃國權解釋,派飯行動嘅本質並非施捨,而係大家分享食物,取得飯菜充飢嘅老人家如果聽到由衷嘅祝福語,心中自然多一分暖意。當晚在場嘅仲有愛心飯團財務總監利僑峰、秘書長鍾美玲、副會長林麗華、壽臣山獅子會創會會長嚴偉貞、和諧之家總幹事李劉素英等。利就話,長者決定伸手索援時,或多或少都要放下自尊,所以就算係雪中送炭,都要顧及對方嘅尊嚴同感受,勿令人產生嗟來之食嘅印象。

鍾美玲多年來都係服務長者嘅義工,佢其中一項任務就係陪伴獨居老人或乏人探望嘅院舍長者到醫院覆診。鍾話,呢啲老友記表面上好似無親無故,其實當中唔少都係有兒女,陪伴佢哋覆診時,佢絕不主動詢問人哋嘅家庭狀況,以免勾起對方不快嘅回憶,至於經濟狀況就更不宜八卦,否則惹人誤會別有企圖就唔係咁好咁話。

嚴偉貞辦嘉年華助長者體檢

嚴偉貞都話好明白長者嘅感受同睇法,又提到多年前同區議員合作為華貴邨長者提供免費大腸癌篩檢服務,雖然表格同收集「便便」樣本嘅容器已派發,但明白到好多長者都怕聽到壞消息,或會拒交樣本,於是佢就舉辦一場嘉年華會,老友記一定要交出填好嘅表格同便便樣本先可以入場,有賴呢次嘉年華活動,長者大腸癌篩檢服務先得以順利完成